Oct 8, 2012

இங்கிலீஷ் விங்கிலீஷ்

மாமி இங்கிலீஷ் கற்கிறாள். இதுதான் கதை என்பதை போஸ்டர் பார்த்த குழந்தைகூடச் சொல்லிவிடும். ஏன் கற்கிறாள்? இங்கேதான் ஆரம்பிக்கிறது இந்தப்படம் ஏன் நல்லபடம் ஆகிறது  என்பது.

அழகான வாழ்க்கை. கணவர் மனைவி மகள் எல்லாரும் இவள் சமையலைப் பாராட்டதான் செய்கிறார்கள். போதாக்குறைக்கு சிறுவாட்டுப் பணமாக லட்டு விற்ற 500ரூபாய்க் கட்டு வேறு சிரிக்கிறது. இங்கிலீஷ் தெரியாதுதான். அதனால் என்ன?

இங்கிலீஷ் பேசும் ரிசப்ஷனிஸ்டுடன் புருஷன் சோரம் போகிறானா? இல்லை.
மகள் மதிக்காமல் உனக்கும் எனக்கும் உறவோ ஒட்டோ இல்லை என்கிறாளா? இல்லை.
மகள் பள்ளி ஆசிரியர் இங்கிலீஷ் தெரியவில்லை என்று கேவலப்படுத்துகிறாரா? இல்லை.
அமெரிக்காவுக்குச் செல்லும்போது இங்கிலீஷ் தெரியவில்லை என்று விசாக்காரார்களோ இமிக்ரேஷன் காரர்களோ திருப்பி அனுப்புகிறார்களார்? இல்லை.
இங்கிலீஷ் தெரியாததால் அமெரிக்காவில் வழிதெரியாமல் வில்லன்களிடம் மாட்டி ஹீரோ பஞ்ச் டயலாக் பேசிக் காப்பாற்றுகிறாரா? இல்லவே இல்லை.

எந்த மிகைப்பட்ட காரணமும் இல்லை. ஒரு பெண்ணுக்கு இயல்பாக ஏற்படும் "தனக்கு மரியாதை இல்லை" என்ற மெல்லிய வருத்தம், அதுசார்ந்து எழும் ஈகோ.. இவர்களுக்குத் தெரியாமல் நானும் வென்று காட்டுவேன் என்று எழும் தன்னம்பிக்கை. என் உறவுப் பாட்டி ஒருவர், 88 வயதில் ஹிந்தி கற்று ப்ராத்மிக் பரீட்சைக்குக் கிளம்பியதைப் பார்த்திருக்கிறேன். இந்தப் படத்தில் மீண்டும் பார்த்தேன்.

இவ்வளவு மென்மையான உணர்வை பார்ப்பவர்களுக்குக் கடத்தவேண்டும் என்றால் அபாரமான நடிப்பும் உடல்மொழியும் காட்சியமைப்புகளும் ஒத்துப் போகவேண்டும். ஸ்ரீதேவியும் கௌரி ஷிண்டேவும் அதைச் சாதித்திருக்கிறார்கள்.

நியூயார்க் மெட்ரோ ரயிலில் பயணிக்க எங்கே கார்டைச் சொருகவேண்டும் என்பது தெரியாத, ஓரளவுக்குத் தெரிந்த, பழக்கமான - என்ற மூன்று நிலைகளையும் ஸ்ரீதேவி காட்டும் நடிப்பு ஒன்றே போதும். எல்லாக் காட்சிகளிலும் இருந்தாலும் அலுக்காத முகம், நடிப்பு என்று அசத்தியிருக்கிறார். 

ஸ்ரீதேவி மட்டுமல்ல, ஒரு காட்சிக்கு வரும் அமிதாப் (இமிக்ரேஷன் வாயிலில்: நானா? உங்கள் பொருளாதாரத்தை உயர்த்த வந்திருக்கிறேன். வேண்டாமா? திரும்பப்போய்விடட்டுமா?), துள்ளிக்கொண்டே பாடம் எடுக்கும் டேவிட் (return back தேவையில்லை, return போதும்..) , பாகிஸ்தான் ட்ரைவர் (இந்தியன் சிஸ்டர், மெக்சிகன் சிஸ்டர், சீன...) , மெக்சிகன் ஆயா (I will teach all of america spanish) , சாஃப்ட்வேர் தமிழன் (I love Idly and my mother.. no My mother first and idly next), முடிவெட்டும் சீனாக்காரி (May I slap you?), கே ஆஃப்ரிகன் அமெரிக்கன் (I am here not to speak, but listen), ஃப்ரென்ச் ஹோட்டல் சமையல்காரன் (cooking is art, you are artist) - எல்லாருமே கச்சிதமான பாத்திரங்கள். கனகச்சிதமான நடிப்பு.

லட்டுத் தட்டோடு வரும்போது பயமுறுத்தி, லட்டுகள் கீழே விழுந்தவுடன் ஓடிப்போய் வெளிறிப்போன முகத்துடன் சாரி கேட்கும் சின்னப் பையனிடமே அற்புதமான நடிப்பை வாங்கத் தெரிந்திருக்கிறது இயக்குநருக்கு.

பின்னணி இசையையும் குறிப்பாகச் சொல்லவேண்டும். பலநேரங்களில் சின்னச் சின்ன ஒலித்துணுக்குகள் உணர்ச்சியை போல்ட் இடாலிக் அண்டர்லைன் எல்லாம் செய்து காட்சிக்குப் பலம் சேர்க்கிறது.

எந்த எதிர்பாராத திருப்பமுமே இல்லாத கதையை இரண்டரை மணிநேரம் சுவாரஸ்யமாகச் சொன்ன திரைக்கதை. 

குடும்பத்துடன் போயிருந்தேன். குழந்தைகளும் ரொம்பவே ரசித்தார்கள். 

இங்கிலீஷ் அல்ல கதையின் முக்கியமான விஷயம் - எவ்வளவு சாதாரணமாக இல்லத்தரசிகளை நினைக்கிறது இந்தக் குடும்ப அமைப்பு, அவள் உணர்ச்சிகளுக்கு குடும்ப அங்கத்தினர்கள் கொடுக்கும் மரியாதை என்ன - இவைதான் முக்கியமான விஷயம்; இதைச் சொல்ல இங்கிலீஷ் ஒரு கருவி. மனைவிகளிடம் நிச்சயம் ஹிட் அடிக்கக்கூடிய டாபிக்.

இந்தப்படம் ஓடும். ஆனால் வைஃபாலஜியால் பாதிக்கப்பட்ட கணவர்களின் நுண்ணுணர்வுக்கு, இதுவரை படமும் வரவில்லை, வந்தாலும் ஓடாது :-(( நம் சோகம் நம்மோடுதான்..

Highly recommended. See with your family.


11 பின்னூட்டங்கள்:

பட்டிகாட்டான் Jey said...

அண்ணே, விமர்சனம் சூப்பர். செம ஹுயூமரோட எழுதிருக்கீங்க. உங்க விமர்சனம் படம் பார்க்கத்தூண்டுது.... அதுவும் தங்க்ஸை கூட்டிட்டு போனா அவுக சந்தோசப்படுவாங்க போல.

கடைசில எழுதின வைஃபாலாஜி பன்ஞ் சூப்பரோ சூப்பர் :-)))

ஹுஸைனம்மா said...

படம் பற்றிய விமர்சனங்கள் பார்க்கும்போது, சின்ன வயசில் பார்த்து ரசிச்ச "Mind your language" தொடர் நினைவுக்கு வருது. கண்டிப்பாப் பார்க்கணும்.

ஆனா, ஒரு கேள்வி வருது. இந்தக் காலத்தில் அநேகமா எல்லாப் பெண்களுமே ஒரு டிகிரி வரைக்கும் படிச்சிடுறாங்க. எப்படியோ தத்தித் தடுமாறியாவது ஆங்கிலத்தில் சமாளிச்சிடுறாங்க. அதைப் போய்ப் பெரிசா..

சரி, எங்கஷ்டம் எனக்கு. எம்மகன், எங்கூட்டுக்காரைப் போல எனக்கு மெக்கானிக்கல், எலக்ட்ரிக்கல், எலெக்ட்ரானிக்ஸ்னு ’டெக்னிக்கல்’ நாலெட்ஜ் இல்லங்கிறதுதான் குறையாத் தெரியறதால, ஆங்கிலம் தெரியாதது பெரிசாத் தெரியல போல.

//கணவர்களின் நுண்ணுணர்வுக்கு, இதுவரை படமும் வரவில்லை, வந்தாலும் ஓடாது//
இதுக்குத் தனியா படம் வேற எடுக்கணுமா? (சிந்துபைரவி?!) அதான் எல்லா படங்களிலுமே ஒருசில சீன்கள், கதைகளில் சில வரிகள்னு போற போக்குல “மனைவி அமைவதெல்லாம்...”னு ஒரு நினைவு’படுத்தல்’ தவறாம இருக்குமே!! பத்தாததுக்கு, பதிவுலகத்துல இதுக்குன்னே பதிவு எழுதுறவங்களும் எக்கச்சக்கம் இருக்காங்க. இதுக்கு மேலயுமா... ??
:-))))))

amas said...

I hope you read my review too :-) http://amas32.wordpress.com/2012/10/06/review-of-english-vinglish/
Loved your review :-)

amas32

புதுகைத் தென்றல் said...

என்னடா அண்ணன் இல்லத்தரசிகளின் உணர்வு பத்தில்லாம் எழுதறாரேன்னு நினைச்சா கடைசியில இல்லறவியல் சொல்லி முடிச்சிருக்கீங்க. :))

புதுகைத் தென்றல் said...

//கணவர்களின் நுண்ணுணர்வுக்கு, இதுவரை படமும் வரவில்லை, வந்தாலும் ஓடாது//
இதுக்குத் தனியா படம் வேற எடுக்கணுமா? (சிந்துபைரவி?!) அதான் எல்லா படங்களிலுமே ஒருசில சீன்கள், கதைகளில் சில வரிகள்னு போற போக்குல “மனைவி அமைவதெல்லாம்...”னு ஒரு நினைவு’படுத்தல்’ தவறாம இருக்குமே!! பத்தாததுக்கு, பதிவுலகத்துல இதுக்குன்னே பதிவு எழுதுறவங்களும் எக்கச்சக்கம் இருக்காங்க. இதுக்கு மேலயுமா... ??
:-))))))//


ஐ லைக் இட்

பினாத்தல் சுரேஷ் said...

பட்டிக்காட்டான் ஜே, வருகைக்கு நன்றி. கருத்துக்கும் நன்றி.

ஹுசைனம்மா, நன்றி.

ட்ரெய்லர் பார்த்து “மைண்ட் யுவர் லேங்குவேஜ்” எனக்கும் நினைவு வந்தது. ஆனால் சிற்சில ஷாட்ஸைத் தவிர வேறெந்த சம்மந்தமும் இல்லை.

/இதுக்குத் தனியா படம் வேற எடுக்கணுமா?/ குட் கொஸ்டின். ஆனா பெண்கள் நாட்டின் கண்கள்னு தமிழ்லே வந்த 70% படங்கள் சொல்லும்போது, எங்க சோகத்தை, கேவலம் பாக்ஸ் ஆஃபீஸே தடுத்து நிறுத்தற அவலத்துல கண்ணீர் விட்டு அதுல போட் ஓட்டிகிட்டிருக்கோம். ஆண்பாவம் பொல்லாதது.

அமாஸ்32, உங்கள் விமர்சனமும் படித்தேன். நன்றாக எழுதி இருக்கிறீர்கள்.

புதுகைத்தென்றல், அப்பப்ப இல்லத்தரசிகளைப் பாராட்டி வச்சுக்கறது வைஃபாலஜியின் முதல் பாடத்துலயே வந்துருதே..

லைக்கா? அதுக்கும் மேலேயே பதில் சொல்லியாச்சு..

திண்டுக்கல் தனபாலன் said...

விமர்சனத்திற்கு நன்றி... படம் பார்க்க வேண்டும்...

தகடூர் கோபி(Gopi) said...

ம்ம்...

:-)))

அது சரி.. இந்த படத்துல வந்த ஒரு வசனத்தினால் மெல்லிய இந்தி திணிப்பு சர்ச்சை ஒன்னு வந்ததே.. சர்ச்சைக்குறிய வசனம் இருக்கா இல்லை நீக்கிட்டாங்களா?

பினாத்தல் சுரேஷ் said...

நன்றி தனபாலன்.

கோபி,

/சர்ச்சைக்குரிய வசனம்/ ஆஹா.. இருக்கே. ஆனா தமிழ்லே மாத்திட்டாங்க. தமிழாளுங்க பாக்காட்டி பொங்க மாட்டாங்க.. இல்லையா?

Ramya Nageswaran said...

நல்ல படத்தை பற்றிய மிக நல்ல விமர்சனம்!

Ramya Nageswaran said...

நல்ல படத்தை பற்றிய மிக நல்ல விமர்சனம்!

 

blogger templates | Make Money Online