நவீன கவிதை 15 Jan 2006

நவீன கவிதை எழுதும் ஆசை என்றுமே பினாத்தலாருக்கு உண்டு. நவீன கவிதைக்கான இலக்கணங்கள்(நன்றி: ஆஸீப் மீரான்) கவிதையைவிட, கவிஞனைப்பற்றியே அதிகம் இருக்கிறது. கவிதை செய்யப்படக்கூடாது, அது தன்னைத்தானே எழுதிக்கொள்ள வேண்டும் என்று ஆரம்பித்து, கவிதைக்கு அர்த்தம் சொல்லக்கூடாது, யார் என்ன கவிதை எழுதலாம் என்று ஆயிரத்தெட்டு விதிகள்.

என்றாலும், இன்றைய விதிமீறல்கள்தான் நாளைய விதிகளை உருவாக்கும் என்பதால், தமிழுக்கு மேலும் ஒரு கவி அலங்காரத்தை சமர்ப்பிக்கிறார் பினாத்தலார்!


கவிதையும் காப்பியும் ஒன்றுதான்

அதிகாலை பொடி அழுத்தி
கறந்தபாலுக்காய்க் காத்திருந்து
இலக்கணம் மாறாமல் அசை பிரித்து சீர் பிடித்து
அம்மாவின் கை மரபுக்காப்பி

அவசரம் ஆட்டுவிக்க
பாலின் மேல் பொடி தூவி
இலக்கணங்களைக் கட்டுடைக்கும்
புதுக்காப்பி

சிக்கனம் கருதி சிக்கரி போட்டு
ஜனத்தை மயக்க மணத்தை சேர்த்து
சினிமாப்பாடல் போல ஓட்டல் காப்பி..

இருந்தாலும்..
தன்னைத்தானே எழுதிக்கொள்ளும் கவிதையைப்போல
காபி தன்னைத்தானே போட்டுக்கொண்டதில்லை எந்நாளும்..